|
- يعني هكذا مدري كيف حسيت أن الوضع في اليمن مدري كيف !!
- ايوه صح الواحد يحس كذا وكأن الوضع باليمن مدري كيف !!
- اليمنيون مش داريين ، مدري ليش مش داريين مدري كيف ؟
- أنت كيف تشوف ؟
- مدري كيف ؟
- طيب السياسيين تقل داريين ايش اللي بيحصل وإلا مدري كيف ؟
- شكلهم داريين بس مش داريين ايش آخرتها لأن نهاية مسلسلات السياسية في بلادنا مدري كيف ؟
- حتى المحللين السياسيين ارتبشت عليهم ما عد عرفوا يحللوا ولا يحرموا وأصبح كل واحد يغرد له في وادي مدري كيف.
- يقولوا الوضع في اليمن معرض للانهيار وإلا كيف ؟
- أنا أشوف أن حال اليمن مدري كيف.
- مخرجات الحوار مارضيت تخرج
- والأقاليم ؟
- كانت خمسة الآن مدري كيف ؟
- يعني كيف ع تنقص؟ وإلا ع تزيد ؟ وإلا مدري كيف ؟
- اعتقد أنها مدري كيف واحتمال يسير الخمس من الأقاليم وإلا كيف ؟
- و مشروع اليمن المدني الواحد كيف ؟
- تاه في زحمة المشاريع الداخلية والخارجية التي تتطاحن فيما بينها وكل يسعى إلى بناء خرابته على أنقاض واقع مدري كيف.
- تعرف مدري كيف الواحد يفكر كذا أننا نتفرج على فيلم اكشن كله حبكات بس نهايته مدري كيف ؟
- نهاية أي فيلم معروفة البطل يتزوج البطلة إلا في سينما اليمن مدري كيف؟
- أحنا عكس العالم في كل شيء حتى في السينما حقنا يعني إذا نهاية الفيلم في أي دولة في العالم البطل يتزوج البطلة عندنا في النهاية البطل يطلق البطلة وكل واحد يدبر نفسه ويعيش حياته مدري كيف.
- والجمهور كيف ؟
- الجمهور يفصفص زعقة أو يخزن وينتظر كيف القات ؟
- القات حق أمس مدري كيف ؟
- كيف ؟
- أول ما خزنت به شفت ماليزيا و اليوم الثاني شفت الصومال.
- مثل التغيير وإلا كيف؟
- مدري كيف ؟
اذكروا الله وعطروا قلوبكم بالصلاة على النبي
اللهم ارحم أبي وأسكنه فسيح جناتك وجميع أموات المسلمين
في الخميس 16 أكتوبر-تشرين الأول 2014 10:32:12 ص