|
|
|
|
|
يابقرة صبي ديزل
بقلم/ صحافي/احمد غراب
نشر منذ: 10 سنوات و 6 أشهر و 7 أيام
الخميس 15 مايو 2014 06:43 ص
يابقرة صبي ديزل
عبدالله سافر واقبل
سار الغربة وترحل
ورجع بلده وتعطل
وعياله وسط الحارة
كلهم يشتوا سيكل
وأبوه على فراشه
مطروح وجسمه انشل
وزوجته مريضة
وإسعافها فريضة
****************
يا بقرة صبي واحكي
عبدالله مهموم يبكي
وعمه الفلاح يشكي:
" زرع الحقول يذبل
ولا لقينا ديزل
سار الولد لامعبر
بالشاص والبراميل
له شهر وهو مطوبر
قد أرجله دماميل
واليوم رجع بدبة
لا غير في مسبه
غبني عليك وارمان
كيف شاتموت عطشان ؟ "
يابقرة صبي ديزل
****************
يابقرة صبي ماء
عبدالله صابه عمى
وعياله يبكوا ظما
والماء من اين يجيبه ؟
وحالته تعيبة
والوايت بخمسة ألاف
والبيت كله جفاف
والماء أين تبخر ؟
ما غير هواء وفوتر
مشروع وقف وودع
شاف العطش وتمم
وصاحب العمارة
خزن بقات بايت
وكل يوم يشتي
نفرق بقيمة وايت
****************
يابقرة لصي لصي
الكهرب طفي طفي
الا الفواتير لصي
واحمد غراب تحول
من الظلام خفاش
ماطورنا عليه شاش
في وسط غرفة انعاش
والكهرباء ورطة
جابت رعاش وجلطة
وأصبحت تطفي
من غير برج وخبطة
ولا خروج محطة
وفتحي يا لمبة
وغمضي يا لمبة
****************
يابقرة صبي سلف
عبدالله جاله تلف
وعياله يشتوا لقمة
واللقمة تشتي فلوس
والفلوس تشتي عمل
والبلد حاله واقف
وشعبنا في حالة
غارق حتى الثمالة
في بحر من بطالة
حتى الموظف مديون
وصار مثل المجنون
وصاحب البقالة
قفل عليه حسابه
وقال ممنوع الدين
ولا تقولي بعدين
****************
يا بقرة صبي ديزل
الشعب ماعاد يتحمل
والجرعة باطل ابطل
مابش جرعة تتجمل
والشعب اليمني اعقل
مهما بزغ او قطل
والكهرب مابش له حل
والعقل اللاصي ذحل
قالوا ثورة ويتبدل
ولوضع احسن نتحول
ورجعنا ريوس قرنين
للبقشة وزمان اول
****************
يا بقرة صبي ثورة
قد مرشد باع البقرة
وحمادي راهن ثوره
واحد شغال في تاكسي
والثاني وسط الجولة
وعياله يشتوا برعة
والبرعة تشتي طاسة
والطاسة تشتي دقة
والدقة تشتي طاقة
والطاقة تشتي ديزل
والديزل يشتي جرعة
والمسكين اصبح سلعة
والغلاء شغال قرعة
كل مسؤول ينفع نفسه
والشعب ماحد نفعه.
اذكروا الله وعطروا قلوبكم بالصلاة على النبي
اللهم ارحم ابي واسكنه فسيح جناتك وجميع اموات المسلمين
أضف تعليقاً على هذا الخبر |
|
|
|
|
|
|
 |
طباعة المقال
مقالات
